Psa 62 | KYG | STEP | Nagupi mafa'nemo'a ge osuno Gotifeke'mo agava mai'niye. Agai'age'mo nagufamo alino katino nategaiye.

Psalms 62

Goti'a agai'age'mo nagufamo alino katino nategaiye, huno hu'niya gemae

1 Nagupi mafa'nemo'a ge osuno Gotifeke'mo agava mai'niye. Agai'age'mo nagufamo alino katino nategaiye. 2 Agai'age'mo yafa'nimo mai'neno nagufamo alino katino ne'nateya Goti'nimo'mo mai'niye. Naha maesige'na afa'a maiguve.

3 Lapakaemo na magi afina'mo kame hutapa nategae. Lapakaemo aino aega hu'niya yafa kegi'yagana hutapa maige uti uti ne'aiya kegi'yagana hutapa maige hu'nayanagetapa asagautapa aitetapa faligae. 4 Apakaemo ali'a afepi'mo yaga au'a atalesayafe'mo vege nehae. Aigofe gemo hisayafe'mo apamogaga ne'aiye. Apakaemo apavaya'aletike'mo Goti'a ha maeno, hu'a nehaya'monanafa apaipafi'mo Goti'a amagino, hu'a apakesamo ne'afiye.

5 Nagaemo Goti'a naha maegaiye, hu'na nagesamo afi'na fatago nehuva'mofe'mo nagupi mafa'neyo, hu'na, ge osuka Gotifeke'mo agava maiyo. 6 Agai'age'mo yafa'nimo mai'neno nagufamo alino katino ne'nateya Goti'nimo'mo mai'niye. Naha maesige'na afa'a maiguve. 7 Goti'a nagufamo alino katino nateteno nagi'nile'mo alino asaga huno nategaiye. Goti'a lokiya yafa'nimo mai'niye. Nagaetegamo hosu kava'mo afole ne'aige'nae'mo agaepi'mo alagepa hu'na fala ki'na ne'mauve.

8 Vaya'mogitapae, hu'na, muki afina'mo agaefeke'mo lapakesamo afitapa fatago hutetapae'mo, laha maegaiye, hutapa hiyo. Lapaipafati'mo ani'mo alitapa lakigekana hutapa nunumu hutapa ha paiyo. Lagaetegamo hosu kava'mo afole ne'aigetae'mo Gotipi'mo alagepa huta fala kita ne'maune.

9 Apaki o'ali'nisaya vaya'mo afa vaya'mo mai'nae. Apaki ali'nisaya vaya'mo aigofe vaya'mo mai'nae. Sigelile'mo asaisunageno'ae'mo kana'apimo ohanegaiye. 10 Lapakaemo agoti hutapa apatege kumaya alige hisayafe'mo lapakesamo o'afiyo lapa o'maegayanagi. Monitapimo mago'e huno afole aisigetapae'mo, laha maegaiye, hutapa lapakesamo o'afiyo.

11 Goti'a magoke afina'mo ge hu'niye. Nagaemo lole afina'mo afi'novana Goti lokiya'amo hane'niye, hu'na ago afi'nove. 12 O Ala kava nene, hu'na, vayakae'mo kahau huka ne'apatane, hu'na ago afi'nove. Kagaemo kava'apilefe'mo apamete apamete huka alika fako huka ne'apamine.